Ke Akëkööl ke Ayethop tɔ̈ në ye buŋëic, aa ye akëkööl thɛɛr. Aye lueel mɛn ke Paan de Girik yenë të cɛkkë ku lueelë ke thïn eya. Ku raan ye lueel ke yen e cak ke akëköölkë, aye cɔl Ayethop. Aye kɔc nyic ka thɛɛr thɔ̈ɔ̈ŋ lan ke Ayethop e pïïr në kɛm ke 600 agut cï run ke 500, ɣɔn ŋoot Yecu Këritho kenë dhiëëth. Ku yen Ayethop aye lueel mɛn ke ye aluaak. Acï kɔc kɔ̈k gɔ̈t mɛn ke Ayethop e ye raan de Paan de Yithiopiya mɛn mat akeu kenë Paan de Thawuth Thudan. Teerdït atɔ̈ në wɛ̈t de Ayethop ku akëkööl ye ke lueel në rinke. Kɔc kɔ̈k aa ye jam mɛn ke cïn raan e cï kan tɔ̈ e ye cɔl Ayethop ku mɛn ke akëkööl cï döŋ në rinke aa ke cɛk kɔc juëc kuɔ̈t ɣɔn pïïr në run juëc arëët cï wan. Ku lon de ke akëköölkë, ye Ayethop yen e wunden ka ye raan dɛ̈t cïe ye, e bï raan ebɛ̈n ceŋ piny ya wɛ̈ɛ̈t në ka ke pïïr. Alëu rɔt mɛn ke anɔŋ kɔc cï kɔ̈k ke Akekööl ke Ayethop kan kueen në thook kɔ̈k cït Thoŋ de Alarap ka Thoŋ de Lëŋliith. Kɔc kɔ̈k eya aa cï ke akëköölkë dhiil piŋ enɔŋ kɔc ye wëët luaŋ de Nhialic.Akëkööl ke Ayethop aa juëc arëët. Keek aa cï ke waar yiic emɛnë në thook juëc ke piny nom. Akëkööl kɔ̈k awaar ke yiic emɛnë ku aa bï bɛ̈n bei në kaam cïï mec.